مساري في دراسة علوم البيانات - دردشة بالعامية المصرية

 

 

 

للناس اللي سألتني عن خريطة لتعلم علوم البيانات، توثيق مهم جدا بالنسبة لي بشكل شخصي.

 

نفسي بتحدثني كتير، هل اتأخرت في البدء في الماجستير؟ هل ضيعت وقت كبير؟

 

اتخرجت واشتغلت، في بداية الشغل كنت تايه، أنا مش عارف ايه المساحة اللى ممكن أكمل فيها، وايه الموضوع البحثي اللى ممكن أكون مهتم بيه. اشتغلت في المركز على موضوعات كتير جدا: القانون العام، الفساد الإداري، الضرائب على الاقتصاد الرقمي، المالية والموازنة العامة، السكان وتنظيم الأسرة، الفقر والتنمية الاقتصادية، الصناعة والتصدير، الاقتصاد غير الرسمي وغيرها كتير...

ومع ذلك الصورة برضه مش واضحة، كل موضوع من دول بذاكره كويس وبعمل فيه شغل حلو، ويبقى السؤال: هختار ايه فيهم؟

 

في يوم المركز قرر يتحمل تكلفة كورس للدكتور راجي أسعد في الجامعة الأمريكية عن "تقييم الأثر - Impact Evaluation" حضرت أول محاضرة أنا وزمايلي، وانبهرت بالموضوع جدا، كان لأول مرة أفهم الفرق بين الارتباط والسببية، متغيرات اقتصادية واجتماعية كتير بتحصل في نفس الوقت وبالتوازي وفي ارتباط كبير بينهم، لكن هل ده يعني إن أحدهم بيسبب الآخر؟ مش جايز في مسبب ثالث أثر عليهم الاتنين أصلا وخلاهم ياخدوا السلوك ده؟

 

الموضوع لذيذ لكن أنا كائن بيتوتي، صعب قوي اروح التجمع يومين في الأسبوع بعد الشغل وارجع للبيت في الهرم واروح الشغل تاني يوم بدري. أنا بحب الراحة وقلة الحركة. فدورت على النت، ولقيت المايكرو ماستر بتاع MIT

 

حاجة عظيمة بجد، الناس اللى بتدرس فيه أخدت نوبل في الاقتصاد عن شغلهم على تقييم الأثر، بس انا عرفتهم ودرست معاهم قبل ما ياخدوا نوبل بأكثر من عام. درست كورسات المايكرو ماستر مرتين، يعنى أنا عدت كل كورس مرتين اتنين، كنت مستمتع جدا وفي كل مرة كنت بطبع المذكرات والكتب وباخد ملاحظات وادونها وحتى الآن محتفظ بيها.

 

بس كان بيواجهني مشكلة، الكوود والتطبيق العملي في المجال ده مش سهل، في العلوم الاجتماعية بشكل عام ومنها الاقتصاد اللى بيكتب كوود مش بيشاركه بسهولة أبدا مع زمايله. 

 

طيب أنا عايز اطبق، أعمل ايه؟ مفيش اجابة، دورت كتير، والموضوع متعب حقيقي، لازم حد سينيور يكون غير معقد بشكل يسمح له إنه يشاركك الكوود بتاعه وده شئ مش بتلاقيه كل يوم.

 

الرحلة دي ضيعت سنتين كاملين، من أواخر 2017 تقريبا حتى أوائل 2020، ومع بدء كورونا، بدأت استكشف مجال جديد تماما، لقيت واحد مشير بوست فيه كوبون خصم لكورسات في علوم البيانات على يوديمي. 

 

سجلت على سبيل الاستخسار، ولما قعدت في البيت بسبب كورونا، قولت أشوف ده ايه.

 

أول كورس كان عن أداة اسمها تابلو، الكورس التاني كان عن بايثون لعلوم البيانات، الموضوع مش سهل، الأساسيات واقعة مني، قطع كاملة من الكوود بتترزع في وشي وأنا مش فاهم ده ايه أصلا. 

 

نفسي استكبرت اسيب الكورس، كملته للآخر، واشتريت كورس آخر لتعليم البايثون من الصفر لواحد اسمه جوزيه بورتيلا على يوديمي برضه. وصلت لنص الكورس وحسيت إن مستوايا مش بطال، ممكن اروح أحاول تاني في علوم البيانات. محاولة أخرى، فهم الكوود أفضل، لكن هناك مشكلة، الإحصاء واقعة مني وكذلك الرياضيات. 

 

عودة أخرى لـ MIT وتحديدا كورسات الاحصاء والجبر الخطي، ثم عودة مرة أخرى للكوود، بكتب كوود كويس لكن مش فاهم الخوارزميات دي بتشتغل ازاي في الخلفية، الدالة اللى كتبتها دي وراها أكواد كتير معقدة في الخلفية انا مش بشوفها، عايز افهمها، روحت لجامعة ستانفورد وتحديدا كورس الماشين ليرننج بتاع أندرو إنج. خلصته بالكامل. وبعدين رجعت لجوزيه تاني أطبق في بايثون الكلام ده. 

 

شويه وحسيت إن المستوى أصبح معقول شوية في الماشين ليرننج، ومحتاج أبدأ تعلم عميق Deep Learning وحاليا شغال على ده، يعنى تقريبا بقالي سنتين برضه.

 

الرحلة لطيفة، والمجال جميل بجد، ومش بواجه معاه مشكلة التطبيق اللى واجهتها في الاقتصاد، المجال قائم على مشاركة الكوود أساسا، أي حاجة محتاج تتعلمها بتلاقي ليها Resources في كل مكان وناس كتير مستعدة تساعدك وتشارك معاك الكوود بتاعها، ده مريح وجميل وبيحد من السلطة الأبوية اللى حسيتها في الاقتصاد شوية. 

 

الخلاصة إن أي حاجة بتاخد وقت ومجهود، مش ندمان على الوقت اللى قضيته بحاول أفهم أنا عايز ايه، ولا ندمان على الوقت اللي قضيته بتعلم تقييم الأثر، كل ده ساهم في تكوين حصيلة معرفية جيدة والمام معقول بفروع مختلفة من العلم تخليني قادر على الربط بينها بشكل مميز.

 

رجوعا للماجستير، طيب دلوقتي أبدأ ماجستير ولا لا؟ موضوع انك تتعلم مع نفسك ده ليه عيب حلو، أيوة عيب حلو، إني بقيت حاسس إن الماجستير في الجامعات المصرية مش هيضيف لي شئ، ما هو إلا مجرد شهادة، أنا معترف انها مهمة، وعايز أخدها، بس مش عايز اضيع وقت علشان أخدها لإني متأكد إنها مش هتضيف لي أي علم حقيقي، ولو هتضيف فأنا ممكن أحصل عليه مع نفسي في وقت أقل وتكلفة أقل بكتير وبجودة أعلى.

 

الخلاصة الموضوع عمره ما كان خطي، هتبدأ وترجع توقف وتبدأ تاني في اتجاه آخر، وهكذا، ومع الوقت هتتشكل الخريطة التعليمية الخاصة بك وفقا لاحتياجك أولا أولا، وغالبا هيحصل عليها تعديلات كتير انت مكنتش مرتب لها في البداية، المهم تستمر.

بوست هدفه الدردشة والتوثيق فقط.